Të vrarë, të zhdukur dhe të plagosur rëndë, 90.000 ushtarë rusë të paaftë
Nga OraNews Përditësimi i fundit 12 Tetor 2022, 22:58
Lufta e përgjakshme në Ukrainë nuk po shkon siç kishte planifikuar Putini. Ukraina po rimerr gjithnjë e më shumë vende, duke përfshirë shumë në dy nga katër territoret që Rusia aneksoi.
Është spekuluar shumë për humbjet aktuale ruse në këtë luftë, por ka pak shifra të besueshme. Portali rus i lajmeve " Meduza " (i bllokuar në Rusi që nga fillimi i pushtimit rus të Ukrainës) ka publikuar tani një shifër që vërteton se tirani i Kremlinit, Vladimir Putin 70 vjeç ka një histori katastrofike lufte.
Sipas një agjenti aktiv të FSB-së dhe një ish-oficeri të sigurimit të shtetit rus, më shumë se 90,000 ushtarë rusë konsiderohen si një "humbje e pakthyeshme".
Konkretisht, kjo do të thotë: ushtarë të vrarë, të zhdukur, të vdekur nga plagët e tyre ose të invalidizuara nga plagë të rënda dhe nuk mund të kthehen më në shërbimin ushtarak.
Ky vlerësim i fundit përafërsisht korrespondon me vlerësimet e Ministrisë së Mbrojtjes amerikane dhe britanike. Në gusht, Pentagoni vlerësoi se rreth 70,000 deri në 80,000 ushtarë rusë ishin vrarë ose plagosur rëndë që nga fillimi i luftës.
Në shtator, Sekretari Britanik i Mbrojtjes Ben Wallace tha se viktimat totale të ushtrisë ruse i kaluan 80,000, prej të cilëve rreth 25,000 u tha se ishin vrarë.
Ministria ruse e Mbrojtjes, nga ana tjetër, ka pranuar viktima vetëm tre herë që nga fillimi i luftës.
Hera e fundit që ndodhi kjo ishte më 21 shtator, kur ministri i Mbrojtjes Sergei Shoigu (67) deklaroi se gjithsej 5,937 ushtarë rusë ishin vrarë në luftë.
Disa ditë më parë, Mediazona (një kompani e pavarur mediatike ruse) dhe BBC News Russia publikuan një raport të përbashkët për viktimat ruse të luftës, i cili bazohet në dokumente zyrtare të aksesueshme përmes burimeve të hapura.
Numri i dokumentuar i vdekjeve që ata përpiluan ishte 7,184. Ky ishte numri minimal i ushtarëve rusë të vrarë në luftë që nga 7 tetori.
Shtabi i Përgjithshëm i ushtrisë ukrainase thotë se deri në mëngjesin e 12 tetorit, 63,000 ushtarë rusë janë vrarë në Ukrainë.
