FOTO/ Derbi vishet sërish bardheblu, Tirana perfekte dhe me 10 lojtarë dënon “demat”
Nga OraNews Përditësimi i fundit 2 Tetor 2022, 21:00
Ka vetëm një emër, Redon Xhixha. Është sulmuesi kurbinas heroi më i ri i Tiranës dhe tifozëve bardheblu që fituan jo vetëm derbin e parë të sezonit në “Air Albania” por edhe një idhull të ri, i cili bëri gjithçka vetë për të thyer të kuqtë dhe për të treguar muskujt e skuadrës kampione.
Me 10 lojtarë në fushën e lojës për më shumë se 50 minuta, bardheblutë nuk u trembën madje treguan karakter dhe shfrytëzuan aftësitë e bomberit shtatshkurtër por shumë të shpejtë dhe teknik për të shënuar nga një gol në çdo pjesë dhe për t’u ngjjitur në kuotën e 11 pikëve, 1 më pak se skuadra e Colella-s ende në krye të klasifikimit.
Kryevepër e Tiranës kjo ndeshje që u shoqërua edhe nga akte episodike dhune si ai i minutës së 75 kur një send i fortë goditi Visar Bekajn, por ky ishte një moment që u eklipsua nga prova e forcës së bardhebluve që bënë gjithçka vetë. Fituan fillimisht një 11-metërsh që Rexhepi ia priti Xhixhës, mbetën me 10 lojtarë pasi Lulaj la fushën e lojës por Shehi rimodeloi Tiranën dhe u mbështet te lojtari i momentit, Redon Xhixha që me dy kundërsulme perfekte ndëshkoi të kuqtë.
6 gola në po kaq javë për bomberin bardheblu ndërsa Partizani duhet të bëjë llogaritë me këtë humbje, e dyta sezonale dhe një tjetër disfatë që shtohet në llogaritë e derbit me Tiranën. Partizani nuk e fiton një derbi që prej 6 ndeshjesh dhe kjo disfatë mund ztë ndikojë në aspektin moral të “demave” që duhet të kthejnë sa më shpejt faqe.
Fotot: LSA
