Madrid/ Për Pendarovskin, propozimi i modifikuar francez është shumë më i mirë se i mëparshmi
Nga OraNews Përditësimi i fundit 30 Qershor 2022, 17:34
"Presidenti francez Emmanuel Macron më tha sot dhe unë ia kam përcjellë kryeministrit tonë Dimitar Kovaçevski se Franca si kryesuese e BE-së do të bëjë modifikime në tekstin e propozuar të kornizës negociuese", njoftoi kreu i shtetit Stevo Pendarovski nga Madridi, duke shtuar se ky propozim është shumë më i mirë për Maqedoninë e Veriut se ai i mëparshmi.
“Ky nuk është një propozim i ri. Në dy-tre vende të propozimit ka modifikime që janë bërë në konsultim me të dyja palët. Mirëpo, ne thamë të mos përsëritet gabimi i herës së fundit, askush nuk mundet, as presidenti, as kryeministri, askush nuk mund të flasë në emër të një kombi të tërë, të një vendi të tërë, ka institucione kompetente në vendin tonë. Ne nuk jemi një vend i botës së tretë, të katërt. Ne duhet të konsultojmë atë që tani është një propozim i modifikuar francez, natyrisht së pari në Qeveri, partnerët e koalicionit duhet ta konsultojnë atë, duhet të komunikojmë me publikun maqedonas dhe duhet të komunikojnë me parlamentin maqedonas”, tha Pendarovski.
Kreu i shtetit maqedonas u shpreh se është njohur me përmbajtjen e propozimit, por siç tha ai është rënë dakord që mos komentohet derisa të ketë një përgjigje zyrtare nga Sofja dhe Shkupi.
“Do të pritet që të dyja palët të shprehin qëndrimin e tyre dhe këtu kam një rezervë të vogël për Sofjen, sepse ka një situatë politike mjaft kaotike në të cilën nuk ka qeveri, qeveria ka rënë dhe ministri i jashtëm që është praktikisht lojtari më i hapur në anën e tyre. Në këto bisedime ai dha dorëheqjen disa ditë para rënies së qeverisë," tha Pendarovski, i cili po merr pjesë në samitin e NATO-s në Madrid.
Ai theksoi se ky propozim i modifikuar francez është shumë më i mirë për Maqedoninë e Veriut se ai i mëparshmi.
"A është mjaft mirë tani për tani? Do të përmbahem, sepse dua që të kalojë një raund më i gjerë konsultimesh, gjë që fatkeqësisht me rekomandimin e aleatëve tanë nuk e bëmë herën e kaluar për të mos rrezikuar, siç kërkuan ata, ndjeshmëria e procesit. Duhet të komunikojmë me qytetarët, me njerëzit, me subjektet politike, sepse ju e dini se ne po mundohemi të bëjmë një marrëveshje që do të zgjasë. Ne nuk mund të qëndrojmë për një marrëveshje që nuk na jep asgjë në dorë, dhe në dorën tonë duhet të kemi garanci për identitetin maqedonas dhe garanci se gjuha, kombësia nuk do të përmendet kurrë askund tash e tutje, pa marrë parasysh sa kohë negociatat zgjasin. Pra, nëse nuk e marrim këtë me garanci nga BE-ja, jo nga Sofja, por nga BE-ja dhe Brukseli, nuk mund të hyjmë më tej në proces”, shtoi Pendarovski.
Kreu i shtetit informoi gjithashtu se në bisedat me “miqtë” në Samitin e NATO-s i është thënë se nëse nuk e shfrytëzojnë këtë, mund të jetë shansi i fundit i tillë, sepse tjetri mund të kërkojë kushedi sa vite.
“Na sugjeruan miqësisht që të mos e përsërisnim gabimin sikurse në vitin 2008 kur na refuzuan anëtarësimin në NATO, sepse nuk kishim marrëveshje me Greqinë. E dini çfarë, marrëveshja me Greqinë është bërë për një arsye të vetme. Prespa mbron identitetin kombëtar maqedonas dhe Prespa çimenton gjuhën maqedonase për mbarë botën. Në OKB gjuha maqedonase është përkthyer në të gjashtë gjuhët zyrtare dhe është organizata më e madhe botërore. Nëse nuk vijon, nëse marrëveshja eventuale e ardhshme me Bullgarinë nuk ndjek këto standarde, as unë, asnjë president, ministër, asnjë qeveri apo opozitë thjesht nuk mund ti lejojë vetes luksin të flasë për gjëra të tilla që janë të përcaktuara me dekada, do të thosha shekuj, nga të parët tanë”, shtoi Pendarovski.
Sipas tij, tani qeveria maqedonase duhet të dalë menjëherë dhe të mirëpresë përpjekjet e presidencës franceze dhe të thotë se cilat janë fazat e ardhshme për vendin.
"Kjo është gjëja më e rëndësishme. E përsëris, nuk ka rëndësi që presidenca franceze përfundon sot, e rëndësishme është që propozimi francez, i modifikuar në këtë mënyrë, të vazhdojë të jetojë dhe ta marrë presidenca çeke. Bëhet fjalë për njëfarë vazhdimësie të politikave evropiane ndaj nesh. Pra, çekët nuk do të fillojnë nga nesër e tutje sikur të mos kishte ndodhur asgjë. Mos harroni se disa komponentë të rëndësishëm, për shembull, deklaratat dypalëshe ose të njëanshme për gjuhën tonë, të cilat u dhanë nga propozimi portugez, janë në një formë të caktuar edhe në këtë të ashtuquajtur "Propozimi francez”, theksoi Presidenti i Republikës.
