SHBA/ Dështon debati për armët. Demokratët: Asnjë sulm i armatosur nuk i bën përshtypje republikanëve
Nga Amado Çela Përditësimi i fundit 27 Maj 2022, 10:01
Republikanët në Senatin amerikan të udhëhequr nga demokratët kanë bllokuar përpjekjet e këtyre të fundit për të nisur një debat mbi masat për luftimin e terrorizmit të brendshëm pas ngjarjeve shokuese të javëve të fundit të të shtënave masive me armë zjarri të cilat kanë lënë dhjetëra viktima.
Dy partitë në SHBA, po debatonin për gjetjen e mënyrës më të mirë për të luftuar dhunën me armë zjarri në vend.
Dhoma e Përfaqësuesve, me shumicë demokratësh miratoi një projekt-ligj për terrorizmin e brendshëm javën e kaluar, pas një sulmi masiv në një qendër tregtare në Buffalo në Nju Jork.
Demokratët u përpoqën të fillonin një debat mbi ligjin kundër terrorizmit të brendshëm dy ditë pasi një adoleshent i armatosur vrau 19 fëmijë dhe dy mësues në një shkollë fillore në Teksas.
Raporti i votave ishte 47-47, të pamjaftueshme për të nisur debatin i cili do të kërkonte minimalisht 60 vota.
Demokratët, të cilët për vite me radhë nuk kanë arritur të kapërcejnë kundërshtimin republikan ndaj kontrollit më të rreptë të armëve dhe verifikimit të të dhënave të armëve, tani po bëjnë një përpjekje të re për të bërë kompromis me republikanët për ligjet për kontrollin e armëve pas masakrës së Teksasit.
Megjithatë nuk ka indice se senatorët republikanë janë gati të heqin dorë nga kundërshtimi i tyre.
Ata shprehen se të drejtat e qytetarëve të ndershëm për të blerë armë, do të shkeleshin nëse do të futej një kontroll i biografisë së tyre.
Republikanët thonë se ligji i brendshëm për terrorizmin nuk përqendrohet mjaftueshëm te krimet e kryera nga grupet e majta ekstreme.
"Problemi është se ne kemi një bandë njerëzish që e përshkruajnë këdo me të cilin nuk pajtohen si terrorist ose ekstremist. Ne kemi arritur në një pikë në Amerikë ku termi "ekstremist" tani po përdoret shumë liberalisht dhe ka shqetësime serioze se si do të përdoren këto entitete të reja... Kjo i shqetëson njerëzit."
Sipas projekt-ligjit të ri të nënshkruar nga Dhoma e Përfaqësuesve, pritet të ndërtohen zyra të reja të cilat do të fokusohen në terrorizmin e brendshëm brenda FBI-së dhe Sekretariatit të Sigurisë Kombëtare dhe Drejtësisë.
Ligjvënësit demokratë thonë se zyrat e reja do të përgatisin më mirë qeverinë federale për të marrë masa paraprake kundër terrorizmit të brendshëm.
Disa republikanë besojnë se qeveria e ka tashmë autoritetin për të monitoruar aktivitete të tilla dhe e cilësojnë ligjin e ri të tepërt.
Për udhëheqësin demokrat të Senatit, Chuck Schumer, asnjë formë dhune e armatosur, qoftë terrorizëm në familje, apo të shtëna nëpër shkolla, nuk do t’i bindin republikanët të ndërmerrnin veprime.
