Koleksionisti i Ibrahim Kodrës/ Biznesmeni nga Kavaja prej 20 vitesh blen e ruan vepra të piktorit të njohur
Nga OraNews Përditësimi i fundit 8 Maj 2022, 12:12
Ibrahim Kodra është ndër të rrallët piktorë që ka lartësuar artin shqiptar në arenën ndërkombëtare. Rreth 40 vepra të tij origjinale, të paekspozuara më parë, janë blerë në ankande e ruhen nga një biznesmen nga Kavaja.
Nga ky vizatim me laps plumbi në moshën 8-vjeçare e deri te pikturat në moshë të vonë, Genc Sinella ka koleksionuar shumë vepra të mjeshtrit Ibrahim Kodra.
Piktorin e ka njohur personalisht pas një takimi të parë në vitin 2002.
I dashuruar me artin e tij prej 20 vitesh biznesmeni që jeton mes Kavajës e Italisë mbledh e ruan piktura origjinale të Kodrës të pa ekspozuara më parë.
“Jam takuar në Porto Kanone, ku mjeshtri ka inauguruar skulpturën 4 stinët. Për mua janë të gjitha të rëndësishme. Mund të bëhen 40 piktura, 6 janë të formatit të madh, pastaj janë disa të tjera të formateve të ndryshme e teknikave të ndryshme.”
Nga ato që ka koleksionuar së fundmi veçon një për median. Thuhet se Ibrahim Kodra ka pasur marrëdhënie të mira me gazetarët, shumë prej tyre i kishte miq.
“Kjo bëhet fjalë për gazetarinë, për median, dhe është një nga veprat unikale të stilit të saj. Po të shikosh janë të veçanta.”
Ibrahim Kodra piktori më i njohur shqiptar në arenën ndërkombëtare ka lënë pas rreth 6 mijë vepra, të shpërndara në muze privatë, koleksionistë por vetëm 2 mijë prej tyre janë të regjistruara dhe të dokumentuara.
Miqësia me Pablo Pikason pati ndikime dhe në artin e tij aq sa të njëjtat gazeta spanjolle që shkruanin për Pikason e tregonin Kodrën si "post kubisti i fundit në Evropë".
