Alabama, zhduken së bashku i burgosuri i akuzuar për vrasje dhe gardiania e burgut
Nga OraNews Përditësimi i fundit 2 Maj 2022, 15:41
Një i burgosur nën akuzën për vrasje, po kërkohet nga policia e SHBA pasi është zhdukur bashkë me rojen e burgut.
I burgosuri Casey White dhe oficerja Vicki White u panë për herë të fundit mëngjesin e të premtes në zyrën e Sherifit të Qarkut Lauderdale në Alabama.
Oficerja White kishte thënë se po e çonte Casey për një kontroll të shëndetit mendor, por zyrtarët më vonë kuptuan se një gjë e tillë nuk ishte planifikuar.
Autoritetet po hetojnë nëse oficerja White e ka ndihmuar të burgosurin të arratiset apo nëse ajo është marrë peng prej tij.
Oficerja e kishte çuar të burgosurin për ndihmë mjekësore në orën 9:30 me justifikimin se ai nuk ndihej mirë.
Pak pas orës 11:00 dikush e gjeti automjetin e saj në parkingun e një qendre tregtare.
Rreth orës 15:30 zyrtarët kuptuan se i burgosuri nuk ishte kthyer në paraburgim dhe askush nuk mund të kontaktonte me oficeren.
Pavarësisht mbiemrit që e kanë të njëjtë, ata nuk janë të afërm me njëri-tjetrin. Autoritetet thanë se Casey White duhet shpallur si një person shumë i rrezikshëm dhe i armatosur, duke qenë se ai mund të ketë marrë armën e oficeres.
Shërbimi i Marshallëve në SHBA ka ofruar një shpërblim deri në 10,000 dollarë për informacionin që çon në gjetjen e Casey White dhe Vicki White.
