Komandanti ukrainas brenda fabrikës së çelikut në Mariupol: Evakuimet e civilëve kanë filluar
Nga OraNews Përditësimi i fundit 30 Prill 2022, 21:26
Disa civilë janë evakuuar nga uzina e çelikut Azovstal në Mariupol pasi u vendos një armëpushim, sipas një komandanti në Regjimentin Azov, një nga ushtarët ukrainas të bllokuar në uzinë.
Kapiteni Svyatoslav Palamar, zëvendëskomandanti i Regjimentit Azov, tha se armëpushimi, i cili supozohej të fillonte në orën 6 të mëngjesit me orën lokale, përfundoi duke filluar në orën 11:00 me orën lokale.
"Për momentin, është e vërtetë, të dyja palët ndjekin regjimin e armëpushimit. Që nga ora 6 e mëngjesit, ne kemi pritur të mbërrijë autokolona e evakuimit, e cila mbërriti vetëm në orën 18:25. Ne kemi sjellë 20 civilë në pikën e takimit të rënë dakord, të cilët kemi arritur t'i shpëtojmë nga nën rrënojat. Këta janë gra dhe fëmijë. Shpresojmë që këta njerëz të shkojnë në destinacionin e rënë dakord, që është Zaporizhzhia, territori i kontrolluar nga Ukraina." - tha Palamar.
“Për momentin, operacioni i shpëtimit është duke vazhduar, i kryer nga ushtarakët e Azov. Ne i shpëtojmë civilët nga nën rrënoja. Këto janë gra, fëmijë dhe të moshuar”, tha ai në një video-mesazh në kanalin Telegram të regjimentit.
“Sa i përket të plagosurve – atyre njerëzve që kërkojnë kujdes urgjent mjekësor – është e paqartë për ne pse nuk po evakuohen dhe evakuimi i tyre në territorin e kontrolluar nga Ukraina nuk po diskutohet”, shtoi ai.
TASS, agjencia shtetërore e lajmeve ruse, tha më herët të shtunën se një grup civilësh u larguan nga fabrika e çelikut.
Një korrespondent në vendngjarje tha për TASS se gjithsej 25 persona dolën, duke përfshirë gjashtë fëmijë nën moshën 14 vjeç.
Mendohet se ka qindra njerëz brenda kompleksit të çelikut, duke përfshirë dhjetëra të plagosur gjatë një bombardimi intensiv rus gjatë disa javëve të fundit.
Imazhet më të fundit satelitore të uzinës tregojnë se shumë prej ndërtesave të saj janë kthyer në gërmadha.
Mbrojtësit e uzinës Azovstal thanë se sulmet e së mërkurës mbrëma kishin goditur spitalin e improvizuar brenda kompleksit, duke shtuar shumë numrin e të plagosurve.
