Shefi i OKB-së do të vizitojë Turqinë përpara Moskës dhe Kievit, Zelensky kritika: Logjike të vinte më parë në Ukrainë
Nga OraNews Përditësimi i fundit 24 Prill 2022, 08:45
Sekretari i Përgjithshëm i OKB-së do të vizitojë Turqinë përpara se të shkojë në Moskë dhe Kiev.
Sipas një deklarate të OKB-së, Antonio Guterres do të vizitojë kryeqytetin Ankara të hënën, 25 prill ku do të takohet me presidentin e Turqisë, Recep Tayyip Erdogan.
Më pas ai do të shkojë në Moskë të martën, ku do të takohet me presidentin rus Vladimir Putin dhe do të ketë një "drekë pune" me ministrin e Jashtëm Sergei Lavrov.
Ndalesa e tij e fundit më pas do të jetë në Kiev të enjten, ku do të takohet me Presidentin e Ukrainës Volodymyr Zelensky dhe ministrin e Jashtëm Dmytro Kuleba.
Turqia ka shërbyer si ndërmjetëse midis Ukrainës dhe Rusisë gjatë luftës dhe ka pritur bisedimet e paqes midis dy palëve.
Por vendimi i OKB-së për të vizituar Rusinë përpara Ukrainës është kritikuar nga Zelensky.
"Lufta është në Ukrainë, nuk ka trupa në rrugët e Moskës. Do të ishte logjike të vinte së pari në Ukrainë, të shikonte njerëzit atje, pasojat e okupimit," tha ai të shtunën.
