Gjermania konfiskon jahtin më të madh në botë në pronësi të oligarkut rus
Nga OraNews Përditësimi i fundit 14 Prill 2022, 22:23
Gjermania ka konfiskuar zyrtarisht superjahtin më të madh në botë në pronësi të oligarkut rus Alisher Usmanov, si pjesë e sanksioneve kundër Moskës pas shpërthimit të luftës në Ukrainë, thanë të enjten burime policore.
"Dilbar" i gjatë 156 metra (1680 feet) ka një vlerë prej 600 milionë dollarësh (555 milionë euro) sipas revistës Forbes.
Që nga tetori i kaluar, varka është ankoruar për riparime në një kantier detar në Hamburg.
Doganat gjermane e kishin vënë në sy superjahtin për disa javë, por nuk mundën ta konfiskonin zyrtarisht atë më herët për shkak të një mosfunksionimi ligjor mbi pronësinë e tij.
Por, Policia federale gjermane la të kuptohet se ka pasur sukses “pas hetimeve të gjata, dhe pavarësisht nga fshehja përmes kompanive ‘offshore’, ka identifikuar pronaren e ‘Dilbar’, e cila është Gulbakhor Ismailova, motra e Alisher Usmanovit”.
“Jahti luksoz është tani nën regjimin e sanksioneve dhe kështu mund të konfiskohet në Hamburg”, shtoi policia në Twitter.
Miliarderi rus dhe motra e tij janë të dy në shënjestër të sanksioneve evropiane kundër oligarkëve rusë, si dhe anëtarëve të familjeve të tyre.
Usmanov, 68 vjeç, u rendit i gjashti në listën e Sunday Times të njerëzve më të pasur në Mbretërinë e Bashkuar në 2021.
Ai është një nga dhjetëra oligarkët rusë të goditur nga sanksionet perëndimore që kur Moska filloi pushtimin e saj në Ukrainë.
Të mërkurën, klubi anglez i futbollit në Premier League Everton pezulloi marrëveshjet e tij të sponsorizimit me disa kompani në të cilat Usmanov kishte aksione, shkruan France 24.
Konfiskimi i "Dilbar" është vetëm i fundit në një varg konfiskimi të superjahteve ruse nën sanksionet perëndimore.
