Kina raketa tokë-ajër në Serbi, ministri kosovar i Mbrojtjes: Sjellje e rrezikshme dhe anti-perëndimore. Nga kush rrezikohet?

Nga OraNews Përditësimi i fundit 11 Prill 2022, 17:52

Serbisë, aleatit të Rusisë iu dorëzua një sistem  i sofistikuar kundërajror kinez në një operacion të 'mbuluar' këtë fundjavë. Mediet dhe ekspertët ushtarakë thanë të dielën se gjashtë avionë transporti Y-20 të Forcave Ajrore Kineze u ulën në aeroportin civil të Beogradit herët të shtunën, duke raportuar se mbanin sisteme raketore tokë-ajër HQ-22 për ushtrinë serbe.

Lidhur me këto raportime ka reaguar ministri i Mbrojtjes së Kosovës, Armend Mehaj.

Përmes një postimi në Facebook, Mehaj e ka quajtur sjelljen e Serbisë të rrezikshme dhe antiperëndimore.

Mehaj ngre pyetjen se nga kush po mbrohet Serbia që është duke u pajisur me sistemet më të avansuara sulmuese dhe mbrojtëse? Ministri i kërkon NATO-s, BE-së dhe OKB-së të shqyrtojnë "qasjen destruktive dhe të rrezikshme të Serbisë."

Deklarata e plotë:

Me blerjen e sistemeve raketore dhe armatimit të ri nga Kina, si dhe sistemeve të mëhershme nga Rusia, rikonfirmohet fuqishëm edhe njëherë sjellja destruktive, shumë e rrezikshme dhe anti-perëndimore e Serbisë.

Sipas informacioneve të dy ditëve të fundit, Serbia ka pranuar nga Kina sisteme të reja të armatimit duke shtuar kontingjentin e saj të mëhershëm të pranuar nga Rusia e Bjellorusia.

Kjo shfaqje e neveritshme po ndodh në kohën kur BE dhe NATO dhe gjithë bota pro- vlerave euroatlantike është në përballje me sulmuesin e këtyre vlerave, Rusinë dhe aleatët e saj.

Nga kush rrezikohet Serbia, apo kundër kujt armatoset Serbia me sistemet më të avancuara sulmuese dhe mbrojtëse?

Ç’është kjo hipokrizi?

Deri kur me këto standarde të dyfishta?

Republika e Kosovës, institucionet e sigurisë dhe mbrojtjes si dhe ne, populli paqedashës dhe liridashës, kemi shprehur në vazhdimësi shqetësimin e arsyeshëm, si dhe në vazhdimësi kemi reaguar për këtë qasje destruktive dhe të rrezikshme të Serbisë ndaj paqes, sigurisë dhe stabilitetit në rajon dhe më gjerë.

Prandaj, kërkojmë nga autoritetet e vendimmarrjes së NATO-s, BE-së dhe OKB-së, si dhe të gjitha instancat tjera të politikëbërjes pro-vlerave të paqes, lirisë dhe demokracisë të shqyrtojnë me seriozitetin maksimal këtë qasje destruktive dhe të rrezikshme të Serbisë që ndikon seriozisht në minimin e paqes, sigurisë dhe stabilitetit në rajonin e Ballkanit Perëndimor dhe më gjerë.

Republika e Kosovës, institucionet dhe populli ynë jemi të vendosur dhe e kemi dëshmuar fuqishëm orientimin tonë euroatlantik me aspiratën e natyrshme për anëtarësim sa më të shpejtë në NATO dhe BE.

Këtë e kemi konfirmuar çdoherë por edhe tani, ku përkrahë me aleatët tanë të udhëhequra nga SHBA, vazhdojmë procesin e ndërtimit dhe zhvillimit të ushtrisë sonë dhe të gjitha institucioneve tjera shtetërore sipas praktikave dhe modeleve më bashkëkohore të demokracive perëndimore.

FSK-në - Ushtri të fuqishme profesionale në mbrojtjen e vendit dhe në shërbim të paqes, sigurisë dhe stabilitetit rajonal, kontinental dhe global.

Ky është misioni ynë dhe ky është interesi ynë jetik shtetëror e kombëtar.
Për këtë jemi të pandalshëm, të pakthyeshëm dhe të pathyeshëm.