Stoltenberg zbulon detaje nga Samiti: Mbrojtje e mëtejshme për Ukrainën, paralajmërohet Kina mos financojë Rusinë
Nga OraNews Përditësimi i fundit 24 Mars 2022, 14:31
Kreu i NATO-s Stoltenberg thotë se blloku ra dakord për mbrojtje të mëtejshme për Ukrainën
Kreu i NATO-s, Jens Stoltenberg ka zbuluar se çfarë është diskutuar në mbledhjen e sotme të liderëve të NATO-s në Bruksel.
"Udhëheqësit e NATO-s ranë dakord se ne duhet dhe do të ofrojmë mbështetje të mëtejshme për Ukrainën," tha ai.
"Ne do të vazhdojmë t'i imponojmë Rusisë kosto të paprecedentë. Udhëheqësit e mbrojtjes miratuan katër grupet tona të reja të betejës në Bullgari, Hungari, Rumani dhe Sllovaki."
Stoltenberg tha se NATO do të sigurojë më shumë trupa tokësore, sisteme antitank, drone, fuqi detare dhe avionë në zonat përreth Ukrainës.
Duke folur për kërcënime të tjera, Stoltenberg tha: Ne ramë dakord të bëjmë më shumë, duke përfshirë ndihmën dhe pajisjet e sigurisë kibernetike për të ndihmuar Ukrainën të mbrohet nga kërcënimet biologjike, kimike dhe bërthamore.
"Kjo mund të përfshijë zbulimin, mbrojtjen dhe furnizimet mjekësore, si dhe trajtimin për komunitetin dhe menaxhimin e krizës. Ne jemi të vendosur të bëjmë gjithçka mundemi për të mbështetur Ukrainën dhe unë mirëpres ofertat konkrete të ndihmës të bëra nga aleatët."
Gjithashtu në samit u paralajmërua dhe Kina. NATO tha se ajo duhet të ushtrojë ndikimin e saj për të gjetur një zgjidhje paqësore, në vend që të ndihmojë dhe financojë Rusinë.
