Arrestohen dy 19-vjeçarë në Gjirokastër, transportonin 4 emigrantë të paligjshëm
Nga OraNews Përditësimi i fundit 24 Mars 2022, 12:02
Dy persona që transportonin emigrantë të paligjshëm janë arrestuar nga policia e Gjirokastrës dhe një tjetër është shpallur në kërkim.
Specialistët e Seksionit për Hetimin e Trafiqeve të Paligjshme në bashkëpunim me Seksionin Operacional dhe Policinë Rrugore në bazë të informacioneve të siguruara në rrugë operative finalizuan operacionin "ROAD GUARD 9", si rezultat i të cilit u bë arrestimi në flagrancë i shtetasve E. L., 19 vjeç dhe L. N., 19 vjeç, banues në Lushnjë.
"Arrestimi i këtyre shtetasve u bë pasi u kapën në flagrancë, në aksin rrugor Kakavije-Gjirokastër, në vendin e quajtur "Kordhocë", duke transportuar me automjetin e tyre tip "Toyota", 4 emigrantë të paligjshëm nga vendet MENA, kundrejt fitimit", informoi policia.
Në këkrim u shpall shtetasi D. B., 20 vjeç, banues në Lushnjë, pasi gjatë veprimeve hetimore ka rezultuar bashkëpunëtor në këtë veprimtari kriminale.
Në cilësinë e provës materiale u sekuestruan një automjet dhe dy aparate celulare.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
