Çmimet e larta mbushën për të dytën ditë bulevardin, ritakimi nesër te Kryeministria
Nga OraNews Përditësimi i fundit 10 Mars 2022, 20:58
Bulevardi "Dëshmorët e Kombit" u mbush sërish këtë të enjte me protestues, të cilët kërkuan uljen e çmimeve.
Me këtë banderolë të rinjtë i bënë thirrje kryeministrit ti dalë në mbrojtje popullit dhe jo oligarkëve.
Nisja prej orës 17:00 vazhdoi deri në mbrëmje vonë, ku si asnjëherë tjetër pa asnjë thirrje politike qytetarët mbushën sheshin nga ura e Lanës dhe deri në fundin e Kryeministrisë.
Aktivistë, qytetarë të thjeshtë por dhe të tjerë dolën para folëse me një argument, rritjen e pagave dhe pensioneve dhe uljen e çmimeve.
"Kjo protestë është mbledhja e gjithë mllefit."
Artisti Osman Mula ishte një ndër ata që solli në vëmendje pensionin e ulët, pavarësisht kontributeve që ka dhënë ndër vite.
"Jam Artist i Popullit dhe marr 300 mijë lekë pension. Me datën 1 e marr dhe me datën 6 nuk kam pare. Të të vijë turp."
Si ndriçim edhe këtë radhë shpesh përdorën dritën e celularit, ndërsa deklaruan se do të vazhdojnë të qëndrojnë para Kryeministrisë çdo ditë deri në reagimin e kryeministrit.
Policia shoqëroi dhjetëra protestues deri në shpërndarjen e plotë të saj, pak para orës 21:00.
Mësohet se të shoqëruarit ndodhen në komisariatet 1, 2 dhe 3.
Protesta pritet të vijojë dhe nesër në të njëjtin orar, 17:00.
