Adidas i heq disa miliona federatës ruse, ndërpret marrëveshjen e sponsorizimit
Nga OraNews Përditësimi i fundit 1 Mars 2022, 15:10
Rusia vijon të marrë goditje në aspektin ekonomik dhe sportiv. Pasi u pezullua nga çdo aktivitet futbollistik dhe jo vetëm, Federata e Futbollit të Rusisë humbet një mbështetës të fuqishëm ekonomik për institucionin e saj.
Bëhet fjalë për gjigandin e veshjeve Adidas, kompaninë gjermane e cila ka njoftuar sot se ka anuluar menjëherë marrëveshjen që ishte në fuqi me Federatën ruse.
Adidas ishte sponsor kryesor i ekipit kombëtar të futbollit ndërsa termat financiarë nuk bëhen ende të ditur por nga gjigandi gjerman i veshjeve thuhet se Adidas në rajonet e Rusisë, Ukrainës dhe të shteteve rreth tyre ka 2.9% të xhiros vjetore totale.
Sulmi i Rusisë në Ukrainë ka ndarë edhe shumë sportistë ku shumë figura të shquara të sportit rus janë shprehur kundër agresionit e disa të tjerë e kanë mbështetur./Ora News/.
