Diamanti blu shënon rekord, pritet të dalë në shitje në Hong Kong në vlerën e 48 milionë $

Nga Besmira Pelushaj Përditësimi i fundit 17 Shkurt 2022, 15:57

Një diamant i rrallë, ngjyrë blu, i zbuluar në Afrikën e Jugut pritet të dalë në Ankand në Hong Kong. Guri i çmuar, që është ndër më uniket, me madhësi 15,10 karat vlerësohet të shitet për më shumë se 48 milionë dollarë.

Shtëpia e Ankandeve Sotheby's pritet të nxjerrë në shitje diamantin blu më të madh që ka dalë ndonjëherë në ankand në Hong Kong. Diamanti 15,10 karatësh “De Beers Cullinan Blue” i cili u gjet në minierën Cullinan në Afrikën e Jugut, në vitin 2021, vlerësohet të shitet për më shumë se 48 milionë dollarë.

"Guri i çmuar është "perfekt, me prerje natyrale" dhe ndër më të vlerësuarit  ndonjëherë nga Instituti Gemologjik i Amerikës", tha Sotheby's në një deklaratë.

Shitja do të shënojë herën e parë që një diamant blu prej më shumë se 15 karatësh do të dalë ndonjëherë në çekiç. Sotheby's tha se diamanti, i cili u shfaq në Nju Jork këtë javë, do të ofrohet në një datë ende të pacaktuar gjatë “Javës së Luksit” në Hong Kong në muajin prill.

 “Diamantet blu të çdo lloji janë të rrallë në treg, por ky është më i rralli nga të rrallët; asgjë e kalibrit të ngjashëm nuk është shfaqur në ankand vitet e fundit”,  tha Patti Wong, kryetare e Sotheby’s Asia.

Diamantet blu janë të lakmuar pasi janë të rrallë dhe për shkak të ngjyrës së tyre të mahnitshme.

“Ky diamant i jashtëzakonshëm blu është padyshim një nga krijimet më të mira të natyrës. Tani i sjellë në jetë nga dora e një prej prerësve më të aftë në botë, është kryevepra e fundit, aq e rrallë dhe e dëshiruar si veprat më të mëdha të artit,” shtoi ajo.

Në fillim të këtij muaji, Sotheby's në Londër shiti Enigma - diamanti më i madh i prerë ndonjëherë në ankand me 555.55 karat – për 4.3 milionë dollarë.