Blinken uron Serbinë për Ditën e Shtetësisë dhe përsërit kërkesën për njohjen e Kosovës

Nga OraNews Përditësimi i fundit 15 Shkurt 2022, 09:27

Sekretari amerikan i Shtetit, Antony Blinken, ka uruar Serbinë për Ditën e Shtetësisë.

Në mesazhin e urimit, Blinken teksa vë në dukje marrëdhëniet 140 vjeçare mes dy vendeve,  inkurajon Serbinë për  njohjen e Kosovës që sipas tij do të krijojë siguri dhe stabilitet më të madh në rajon.

"Në emër të Shteteve të Bashkuara të Amerikës, uroj popullin e Serbisë për festën tuaj kombëtare.Vendet tona kanë ndërtuar lidhje të forta gjatë 140 viteve të fundit dhe Shtetet e Bashkuara presin të ndërtojnë një të ardhme edhe më të ndritshme së bashku si partnerë në Evropë dhe në skenën globale. Ne jemi të përkushtuar të mbështesim synimin e Serbisë për integrimin evropian dhe inkurajojmë normalizimin gjithëpërfshirës të marrëdhënieve të përqendruara në njohjen reciproke me Kosovën, e cila do të nxisë siguri dhe stabilitet më të madh në rajon".

Blinken thotë se SHBA është krenare që është partnere me Serbinë në forcimin e lidhjeve tona ekonomike, bashkëpunimin e sigurisë dhe mbështetjen e diversifikimit energjetik të Serbisë.

"Partneriteti ynë ekonomik me Serbinë u rrit ndjeshëm në vitin 2021, me investime të reja në sektorët e infrastrukturës, teknologjisë dhe bujqësisë. Ne gjithashtu rritëm bashkëpunimin tonë dypalësh të mbrojtjes, duke festuar 15-vjetorin e Programit të Partneritetit Shtetëror, duke mbajtur një stërvitje të rëndësishme dypalëshe ajrore dhe duke kryer konsultime ushtarake dypalëshe të nivelit të lartë. Lidhjet tona të forta burojnë jo vetëm nga ajo që ne arrijmë mes qeverive, por edhe nga përpjekjet dhe aspiratat e përbashkëta të qytetarëve të përditshëm serbë dhe amerikanë, siç dëshmohet nga 30-vjetori i programit Fulbright dhe nisja e partneriteteve të reja akademike midis universiteteve të SHBA-së dhe Serbisë" shkruan Blinken.

"Ndërsa shikojmë përpara për të ndërtuar një marrëdhënie bilaterale edhe më të fortë, i uroj paqe, prosperitet dhe shëndet të mirë për popullin e Serbisë" përfundon mesazhi i sekretarit ameriakn të shtetit.