Propagandë xhihadiste në rrjete sociale, Belgjika arreston 13 persona për terrorizëm
Nga OraNews Përditësimi i fundit 8 Shkurt 2022, 19:17
Policia në Belgjikë ka arrestuar 13 persona të martën pas bastisjeve në dhe përreth qytetit Antverp, si pjesë e një hetimi disa mujor mbi aktivitetet e dyshuara terroriste.
Sipas Zyrës së Prokurorit Federal, të dyshuarit ishin pjesë e grupit të njëjtë, të cilin e përshkroi si të afërt me qarqet “salafiste”.
Rreth 100 policë u përfshin në këtë operacion në 13 adresa të ndryshme gjatë bastisjes.
Zyra e Prokurorit nuk dha detaje mbi planet e këtij grupi, por tha se operacioni policor nuk kishte për qëllim që të ndalonte ndonjë kërcënim për sulm të menjëhershëm.
Të 13-të do të dalin para një gjyqtari në Antverp brenda 48 orëve, kur do të merret një vendim nëse do të vazhdojë me akuzat.
“Ne nuk i arrestojmë njerëzit pa arsye. Nëse vendosen në arrest, kjo ndodh sepse në dosje tashmë ka elementë që meritojnë të verifikohen apo të hetohen më tej”, tha zëdhënësi i Prokurorit.
Belgjika në dekadën e fundit ka përjetuar disa sulme terroriste. Në 2016, në këtë shtet u vranë 32 persona dhe u plagosën qindra të tjerë pas sulmeve vetëvrasëse me bombë në metronë dhe aeroportin e Brukselit.
