Kokaina e falsifikuar vret 20 persona të varur nga droga, 74 dërgon në spitale
Nga OraNews Përditësimi i fundit 3 Shkurt 2022, 08:03
Të paktën 20 persona kanë humbur jetën dhe 74 të tjerë janë shtruar në spitalet në Buenos Aires, si pasojë e helmimit masiv për shkak të përdorimit të kokainës së falsifikuar me një substancë toksike, njoftuan autoritetet argjentinase.
Autoritetet fillimisht thanë se numri i të vdekurve ishte 12 dhe të shtruarit në spital 50, por me kalimin e orëve numri i viktimave u shtua, tha një zëdhënës i qeverisë së Buenos Aires për AFP.
Autoritetet lëshuan një apel urgjent për të varurit nga droga në media dje pasdite: "Ata që kanë blerë drogë në 24 orët e fundit duhet ta hedhin patjetër," tha ministri i sigurisë i provincës, Sergio Burnie.
Autoritetet po përpiqen të "identifikojnë substancën toksike" të përdorur për të falsifikuar kokainën dhe "ta tërheqin atë nga tregu", shtoi ai.
Gjithçka filloi mëngjesin e djeshëm, kur nisën vdekjet dhe gjithnjë e më shumë njerëz shtroheshin në spital me helmim. Disa nga personat e shtruar në spital i thanë stafit mjekësor se kishin përdorur kokainë.
Viktimat, mes tyre disa tridhjetë e dyzet vjeçarë , pësuan sulme në zemër, sipas raporteve mjekësore të cituara nga mediat argjentinase.
Kokaina që ata konsumuan dyshohet se përmbante "disa substanca që sulmojnë sistemin nervor qendror", tha zoti Burnie.
