Shënohet rekord emigrantësh që kalojnë në mënyrë të jashtëligjshme drejt Anglisë
Nga OraNews Përditësimi i fundit 13 Nëntor 2021, 08:24
Rreth 1,185 persona kaluan Kanalin Anglez me varkë për të arritur në Mbretërinë e Bashkuar të enjten, 11 nëntor një rekord i ri për kalimet e emigrantëve në një ditë të vetme.
Katër anije të Forcave Kufitare kapën varkat që u vunë re në brigje dhe i shoqëruan në Dover.
Tre persona dyshohet se kanë humbur në det, thanë autoritetet franceze.
Një burim i Whitehall akuzoi Francën për humbjen e kontrollit të situatës.
Më shumë se 23,000 njerëz kanë bërë kalimin nga Franca në Mbretërinë e Bashkuar me varkë deri tani gjatë këtij viti.
Të premten, Zyra e Brendshme konfirmoi numrat e saktë, duke thënë se 1,185 njerëz u shpëtuan, u kapën dhe u sollën në breg nga Forcat Kufitare, ndërsa autoritetet franceze penguan 99 persona të arrinin në Mbretërinë e Bashkuar.
Sipas autoriteteve në Francë, tre personat që rezultojnë të pagjetur u raportuan të zhdukur nga emigrantë të tjerë.
Zyrtarët e Mbretërisë së Bashkuar thonë se duan të ndalojnë kalimet nëpërmjet Kanalit, duke i përshkruar ato si të rrezikshme dhe të panevojshme.
Një zëdhënës i Zyrës së Brendshme tha se numri i kalimeve të emigrantëve të enjten ishte "i papranueshëm".
Rekordi i mëparshëm ishte 853 persona që kaluan më 3 nëntor.
"Publiku britanik është mjaftuar duke parë njerëz të vdesin në Kanal, ndërsa bandat e pamëshirshme kriminale përfitojnë nga mjerimi i tyre dhe Plani ynë i Ri për Emigracionin do të rregullojë sistemin e prishur që inkurajon emigrantët të bëjnë këtë udhëtim vdekjeprurës," tha zëdhënësi, raporton BBC.
