Dua e do Kosovën pa viza, këngëtarja me famë botërore i kërkon KE-së lëvizjen e lirë
Nga Besmira Pelushaj Përditësimi i fundit 11 Nëntor 2021, 15:15
Dua Lipa është një nga ambasadoret më të mira të kombit shqiptar në arenën ndëërkombëtare. Teksa u vlerësua nga Këshilli i Atlantikut, këngëtarja kërkoi heqjen e kufizimit të lëvizjes së lirë për bashkëkombasit e saj në Kosovë.
Këngëtarja shqiptare me famë ndërkombëtare, Dua Lipa në prani të presidentes së Komisionit Evropian, Ursula von der Leyen, kërkoi liberalizimin e vizave për qytetarët e Kosovës.
Teksa pranoi Çmimin e Lidershipit të Dalluar nga Këshilli i Atlantikut, Lipa tha se Kosova i ka plotësuar të gjitha kushtet për lëvizjen e lirë.
Fjalimin e saj ylli i muzikës pop e ka nisur në gjuhën shqipe duke i përshëndetur të pranishmit me fjalën “Mirëmbrëma”.
“Të rinjtë luftojnë për të gjetur punë dhe mundësitë e tyre pengohen nga kufizimet që e bëjnë të vështirë udhëtimin për punë ose kënaqësi. Pasi kemi përmbushur të gjitha kriteret, Komisioni Evropian në fakt ka rekomanduar liberalizimin e vizave për Kosovën për më shumë se tre vjet më parë. Pra, a mendoni se ne mund ta arrijmë atë tani?”
E cilësuar si një nga Ambasadoret më të mira të kombit shqiptar në arenën ndërkombëtare, Lipa ia dedikoi çmimin të rinjve të Kosovës.
“Janë vetëm 13 vjet të shkurtra në rrugëtimin tonë të pavarësisë. Dhe si pjesë e një komuniteti të fortë ndërkombëtar, ne do të lulëzojmë emocionalisht, ekonomikisht dhe kulturalisht. Është në gjenet tona. A nuk do të ishte e përshtatshme nëse Kosova të mund të lulëzonte përkrah fqinjëve tanë dhe të shëronte lëndimin e konfliktit të fundit? Me këtë vizion në mendje, e pranoj këtë çmim me mirënjohje për të gjithë të rinjtë e Kosovës”.
Në faqen zyrtare të Këshillit të Atlantikut thuhet se Dua Lipa është nderuar për zotimin e saj për një varg kauzash së filantropisë, përfshirë fuqizimin e gjeneratës së ardhshme të udhëheqësve e muzikantëve të Ballkanit.
Në ceremoni ishte e pranishme edhe presidentja e Kosovës, Vjosa Osmani.
