Virxhinia test politik me Biden, po bie pëlqyeshmëria për presidentin amerikan

Nga OraNews Përditësimi i fundit 3 Nëntor 2021, 11:13

Zgjedhjet në shtetin amerikan të Virxhinias konfirmuan të martën se po shtohet pakënaqësia ndaj demokratëve në pushtet dhe presidentit Joe Biden.

Garën për guvernator e fitoi republikani Glen Jongkin, duke befasuar qytetarët që vetëm një vit më parë ia besuan në shumicë votën Biden-it dhe të majtëve të tij për 12 vite radhazi.

Biznesmeni pati prej fillimit mbështetjen e ish-presidentit Donald Trump.

"Bashkëqytetarët e mi, ky është një moment përcaktues - nisi me dy persona dhe tani bashkë po ecim miliona virxhinianë. Transformimin do e nisim nga dita e parë."

Demokrati Teri MekOlif humbi me gati 2 pikë disavantazh kundrejt Jongkinit dhe mendohet se u penalizua për qëndrimet mbi abortin, rolin e prindërve në shkolla dhe për çështjet kulturore e racore.

Të martën, republikanët patën një garë të ngushtë edhe në Nju-Xhersi, ndërsa nuk pati surpriza në Nju-Jork ku afroamerikani Erik Adams zëvendësoi Bill de Blasion në garën për bashkinë.

Presidenti Biden parashikoi orë më parë fitoren në Virxhinia.

Gara në shtetin lindor të Amerikës u pa si një test politik 10 muaj pas hyrjes së tij në Shtëpinë e Bardhë.

Pëlqyeshmëria për punën e 78-vjeçarit ka rënë në 43 për qind, dhe rënien po e ndikojnë qytetarët e pakënaqur në zonat jo-urbane më të varfra të vendit.