Po raportonin protestat në vend, talibanët dhunojnë gazetarët në Kabul

Nga OraNews Përditësimi i fundit 21 Tetor 2021, 11:22

Talibanët po i trajtojnë dhunshëm gazetarët të cilët po mbulojnë protestat kundër tyre në Afganistan.

Një reporter i huaj dhe dy kolegët e tij, të enjten u ndoqën e u sulmuan fizikisht dhe verbalisht nga militantët teksa po filmonin dhjetëra gra afgane duke marshuar për të drejtat në shoqëri.

Ata qenë pajisur me veshje e armë luftarake amerikane dhe kallashnikovë.

Grupi i grave protestoi nëpër rrugët e kryeqytetit Kabul për të ndalur te Ministritë e Arsimit dhe të Financave.

Me parulla në duar ato kërkuan t'u rikthehet e drejta "për të studiuar e punuar", "të mos politizohet arsimi" dhe se "papunësia do u sjellë varfëri e uri".

Afganistani është prej dy muajsh nën kontrollin e talibanëve dhe me krijimin e qeverisë së re, fundamentalistët myslimanë ua kanë ndaluar vajzave të ndjekin shkollën e mesme, ndërsa shumë gra janë larguar nga puna.

Disa qindra gra afgane janë hequr edhe nga sistemi i drejtësisë nën kërcënimin se kanë dhënë verdikte në dëm të burrave për raste të dhunës në familje, për divorce apo për kujdestaritë.

OKB-ja ka kërkuar që komuniteti ndërkombëtar t'i kushtëzojë ndihmat financiare për Afganistanin nëse talibanët nuk zotohen se do i respektojnë të drejtat e grave në vend.