Rrëshqitjet e dheut groposin shtëpitë nga përmbytjet masive në Indi, 150 persona humbin jetën
Nga OraNews Përditësimi i fundit 21 Tetor 2021, 10:25
Më shumë se 150 persona kanë humbur jetën nga përmbytjet dhe erozioni disaditor në Indi dhe Nepal.
Disa zona të vendeve u përballën ditë më parë me 400 mm shi në 24 orë.
Vetëm rajoni verior indian i Utarakandit njoftoi për rreth 50 viktima si pasojë e sasisë së jashtëzakonshme të reshjeve, të cilat shkaktuan rrëshqitje dheu dhe groposën strukturat e banimit.
Shiu i dendur në shtetin e Nepalit, ndërkohë, shkaktoi mbi 70 vdekje në tri ditët e fundit.
Me dhjetëra trupa u gjendën në distriktet lindore që e lidhin vendin me Indinë.
Persona të zhdukur pati edhe në rajonin e Himalajeve, ku ekspertët thonë se rreziqet nga erozioni po shpeshtohen si pasojë e shkrirjes së akujve, shirave të paparashikueshëm por edhe nga shpyllëzimi prej ndërtimit të një sërë hidrocentralesh nën vargun malor.
Autoritetet indiane presin që reshjet e forta do të vijojnë në rajonin e Keralës. Në 2018-ën, përmbytjet e përmasave historike vranë mbi 500 persona në provincën bregdetare./Ora News/
