“Rrisim luleshtrydhe për të mos emigruar” fermerët në Fier: Kostot e larta janë të papërballueshme
Nga Inelda Vallja Përditësimi i fundit 14 Tetor 2021, 14:25
Familja e Mikel Hamatajt ka nisur të kultivojë 3.5 dynymë me Luleshtrydhe në serat e tij në Frakull të Fierit.
Në kushtet kur fidanët thotë se kanë çmime të papërballueshme, këtë vit vendosi ti mbjellë vetë.
"E bëjmë vetë fidanin, sepse është e kushtueshme t'i marrim nga jashtë."
Por e ardhmja nuk është premtuese për ata që i janë përkushtuar kultivimit të këtij fruti.
"Nuk ia vlen por nuk kemi çfarë të bëjmë. Vetëm për të ardhur vërdallë, nxjerrim për bukën e gojës, sepse për gjë tjetër jo."
Thonë se fitimet nuk i arsyetojnë shpenzimet, ndaj ata punojnë vetëm për të siguruar të ardhurat e familjes.
"Luleshtrydhja ka kosto të mëdha. Që nga vaditja, benzina, nafta, spërkatja. Kemi marrë lekë borxh."
Prodhimi ndër vite thonë se ka qenë cilësor, por vështirësi kanë hasur në gjetjen e tregut.
"Jemi shumë të rrezikuar, sepse nuk e kemi tregun të garantuar dhe pandemia vjet na bllokoi."
E pavarësisht vështirësive thonë se merren me luleshtrydhe që të mos marrin rrugët e emigrimit.
"Ushqehemi, kaq jo më shumë e jo më pak, vetëm mos ikim jashtë shtetit, mos të ikim në kurbet më."
Në Frakull pjesa më e madhe e fermerëve merrem me kultivimin e luleshtrydhes në sera, por të gjithë janë të shqetësuar për kostot e prodhimit.
