Mori peng përgjegjësin e zyrës arsimore për t'i kthyer familjarët në punë, arrestohet 29-vjeçari në Bulqizë
Nga OraNews Përditësimi i fundit 29 Shtator 2021, 15:08
Një 29-vjeçar me iniciale A.K. është arrestuar nga policia pasi ka marrë peng dhe ka kanosur përgjegjësin e zyrës Arsimore në Bulqizë K.K.
Arrestimi u bë pas kallëzimit nga përgjegjësi i Zyrës Arsimore në Bulqizë, i cili ka deklaruar se i riu e ka marrë peng në automjetin e tij duke i kërkuar të rikthejë familjarët e tij në vendin e punës
Njoftimi i policisë:
Nga specialistët për Hetimin e Krimit në Komisariatin e Policisë Bulqizë u arrestua në flagrancë shtetasi:
A. K., 29 vjeç, banues në Shupenzë, pasi shtetasi K. K., 52 vjeç, me detyrë përgjegjës i Zyrës Arsimore Bulqizë, ka bërë kallëzim se 29-vjeçari e ka kanosur dhe e ka mbajtur në automjet, pa dëshirën e tij, me qëllim që t’i rikthente familjarët e tij në vendet e punës.
Materialet procedurale i kaluan Prokurorisë pranë Gjykatës së Shkallës së Parë Dibër, për veprat penale "Kanosja" dhe "Rrëmbimi ose mbajtja peng e personit në rrethana lehtësuese".
