Teatër në komisionet parlamentare/ Opozita prezent në sallë, mazhoranca quan të pranishëm deputetët online
Nga OraNews Përditësimi i fundit 29 Shtator 2021, 14:54
Komisionet parlamentare duket se po kthehen në një skenë të teatrit, duke zëvendësuar atë kombëtar ku luanin artistët. Opozita ka kërkuar që të llogaritet prezenca fizike e tyre, çka refuzohet nga mazhoranca e cila llogarit vetëm deputetët që janë online.
"Agron Gjekmarkaj është kryetari, nuk është. Petro Koçi, jam unë, prezent."
"Është krejtësisht e pamundur që ta bëjmë me prezencë fizike, në rast se dëshironi që të merrni pjesë në mbledhje duhet të logoheni edhe këtu ku jeni."
Një tjetër argument jepet në komisionin e veprimtarisë prodhuese ku premtohet debate ballë për ballë kur deputetët të vaksinohen.
"Që të gjithë deputetët të kryejnë procesin e vaksinimit dhe jam i bindur që me përfundimin ekëtij procesi do të bëjmë të mundur edhe realizimin e mbledhjeve tona në mënyrë fizike."
Pas debateve në komisionin e medieve dhe atë të veprimtarisë prodhuese, deputetët e opozitës theksuan se ky nuk është bojkot, por mazhoranca refuzon transparencën.
"Nuk na u dha fjala. Konferenca e kryetarëve e ka parashikuar qartë në dispozitën për punën e komisioneve online, që në raste të çështjeve të rëndësishme, komisionet mund të bëhen edhe fizikisht."
"Kukullat e Edi Ramës nuk kanë fuqi të përballen me opozitën."
Më herët në konferencën e kryetarëve opozita kërkoi mbledhje të hapura por për PS është situate pandemikë që e ndalon.
Ndërsa në seancën e radhës pritet që PD të kërkojë tre komisione hetimore, për incineratorët, për 120 milionë eurot që Shqipëria i humbi përballë biznesmenit Becheti dhe për votimet e 25 prillit./OraNews/
