Pacientët me Covid në banesë, mjekja e familjes: Më pak antibiotik për të sëmurët

Nga OraNews Përditësimi i fundit 25 Shtator 2021, 15:36

Pacientët me Covid të cilët po marrin trajtim në banesë, javët e fundit po kurohen me më pak antibiotikë.

Protokolli i trajtimit vijon të jetë i njëjtë për rastet e lehta, të cilët marrin vitaminoterapi dhe antipiretik për temperaturën e lartë.

"Mjekimet dhe këshillat që ne u japim pacientëve janë më të lehta. Kemi shmangur antibiotikun, sepse rastet paraqiten më të lehta.

Njerëzit janë ndërgjegjësuar dhe komunikojnë me mjekun e familjes që me simptomat e para."

Mjekja e familjes Xhentiljana Nazaj thotë se është vënë re një shtim i qytetarëve që paraqiten me shenjat e Covid.

Duke qenë se simptomat janë të ngjashme me ato të virozave, këshillojnë kontaktimin e menjëhershëm me mjekun e familjes, për të bërë edhe diferencimin.

"Që nga ditët e para të shtatorit kemi pasur një rritje të fluksit të pacientëve, që na kontaktojnë apo paraqiten me simptomat e Covid-19. Shenjat e Covid janë shumë të ngjashme me simptomave virozave, prandaj është mirë të kontaktojmë mjekun dhe mos të neglizhojmë simptomat e para."

Aktualisht në të gjithë vendin janë 12 157 raste aktive, nga të cilët, 211 janë të shtruar në spital, ndërsa pjesa tjetër po marrin trajtim në banesë.