Varhelyi: Nuk ka vend në BE për ata që mohojnë gjenocidin dhe lavdërojnë kriminelët e luftës
Nga OraNews Përditësimi i fundit 11 Korrik 2021, 18:06
Komisioneri për Zgjerim i Bashkimit Evropian, Oliver Varhelyi, ka dërguar një mesazh përmes një videoje në përkujtimin e viktimave të gjenocidit në Srebrenicë.
“Është detyra jonë e përbashkët sot të kujtojmë gjenocidin në Srebrenicë. Ne kujtojmë dhe nderojmë viktimat, ndajmë pikëllimin e familjeve dhe të mbijetuarve të tyre. Evropa nuk e ka harruar përgjegjësinë për paaftësinë tonë për të parandaluar dhe ndaluar luftën dhe gjenocidin. Është gjithashtu detyra jonë të sigurojmë përgjegjësi, është e rëndësishme të përsërisim të njëjtin mesazh çdo vit”, ka thënë Varhelyi.
Ai ka kujtuar se ngjarjet në Srebrenica u njohën si një akt gjenocidi para dy gjykatave ndërkombëtare.
"Ngjarjet në Srebrenica u njohën si një akt gjenocidi para dy gjykatave ndërkombëtare. Këto fakte të vërtetuara duhet të pranohen. Nuk ka vend në Bashkimin Evropian për të mohuar gjenocidin dhe për të lavdëruar kriminelët e luftës. Përpjekjet për të rishkruar historinë janë të papranueshme. Liderët politikë në Ballkanin Perëndimor duhet të jenë një shembull për të kundërshtuar rrënjën e urrejtjes, duke kapërcyer trashëgiminë tragjike të së kaluarës," ka thënë ai.
Komisioni Evropian vazhdon të ndihmojë dhe monitorojë proceset e reformave në vend për të përshpejtuar integrimin evropian. Njohja e së kaluarës ndihmon në përparim, sipas Varhelyi.
