"Janë vetëm 5 minuta nga koha juaj", PS apelon qytetarët të votojnë

Nga OraNews Përditësimi i fundit 25 Prill 2021, 18:10

Në të parin mesazh për votuesit,  PS përmes zëdhënëses së fushatës, Bora Muzhaqi, apeloi qytetarët shqiptarë të dalin të votojnë dhe në këtë 1 orë që ka mbetur.

Bora Muzhaqi: Me shumë mirënjohje të gjithë atyre që votuan deri tani dhe qytetarinë e treguar gjatë gjithë ditës ku paqësisht dhe qetësisht keni marrë pjesë masivisht në këtë proces kaq me rëndësi për të ardhmen e vendit. Mbeten minutat e fundit do të thuhej në një ndeshje sportive. Dhe kush nuk ka votuar ende le të përfshihet në proces, të shkojë dhe të votojë deri në orën 19:00.

Ushtrojeni të drejtën tuaj themelore  në këtë ditë ku politika hesht dhe populli flet. Ndiqni shembullin e atyre që deri më tani e bënë detyrën e tyre dhe mos harroni se sa më shumë të marrim pjesë në zgjedhje aq më shumë politika i merr parasysh hallet, shpresat dhe ëndrrat tona. Janë vetëm 5 minuta nga koha juaj që ndikojnë drejtëpërsëdrejti se si do të jenë ditët që kemi përpara. Votoni, votoni.

Deri në orën 17:00 sipas KQZ votuan 43.60% e qytetarëve. Dibra dhe Tirana kryesojnë për pjesëmarrjen.