Rruga e shkatërruar në Shëngjin,banorët “presion” me votat : Ndërhyrje ose bojkotojmë zgjedhjet
Nga OraNews Përditësimi i fundit 22 Mars 2021, 12:26
Kjo është gjendja e rrugës në lagjen sipër portit në Shëngjin.
Kalimi i automjeteve të vogla është thuajse i pamundur nga degradimi i këtij segmenti rrugor i cili të çon drejt Ranës së Hedhun.
Përballë kësaj situate banorët dolën në protestë.
Thonë se shkak për shkatërrimin e rrugës janë bërë mjetet e tonazhit të rëndë, ndërsa akuzojnë autoritetet se nuk kanë bërë asgjë për kthimin e saj në normalitet.
"Për arsye të tonazhit të rëndë janë thyer këto pusetat në të cilat mund të bjerë një person brenda. Ne nuk kërkojmë asgjë më tepër, thjesht mirëmbajtjen e kësaj rruge. Nuk kërkojmë asfalt, nuk kërkojmë drita," thotë një banor.
"Vijnë betonieret e mëdha të bizneseve që po ndërtojnë të Rana e Hedhun, na kanë dëmtuar me kamionët e tonazhit të rëndë," thotë nj qytetar tjetër.
Ndaj tashmë u kanë vendosur ultimatum: Rrugën ose nuk votojmë.
"Asnjë njeri nuk po na jep përgjigje, kërkojmë të bëhet diçka se ne s'do dalim në votime në qoftë se nuk ka rregullohet rruga. U prishën makinat," thotë banori.
Banorët i janë drejtuar me një peticion edhe Bashkisë së Lezhës ku kërkojnë ndërhyrje në infrastrukturë.
