Rikthehen reshjet e borës në veri, probleme në rrugët e fshatrave
Nga OraNews Përditësimi i fundit 10 Mars 2021, 08:47
Reshjet e dëborës në pranverë rikthyen edhe vështirësitë në veri e verilindje të vendit.
Bora nisi të martën në Alpe dhe lartësitë mbi 700 metra, ndërsa gjatë mbrëmjes zbritën në qytetet e Bajram Currit, Kukësit, Hasit e Dibrës.
Lartësia e borës në Valbonë është 50 cm, Shishtavec 10 cm, Qafë-Shllak 30 cm dhe Qafë Prush 20 cm.
Rrugët nacionale janë të kalueshme, përfshirë rrugën e Kombit raportohen të gjitha të kalueshme pa zinxhirë.
Ndryshe reshjet e dëborës së shkurtit, duket se kompanitë mirëmbajtëse kanë nxjerrë mësime duke nxjerrë borëpastruese në rrugë menjëherë.
Vështirësi ndërkohë ka në rrugët rurale në qarkun e Kukësit.
Sipas Komisionit të Mbrojtjes Civile pranë prefekturës, akset rurale në administrim të bashkive janë të qarkullueshme pjesërisht me zinxhirë , përveç rrugës që lidh njësinë Arrën me rrugën nacionale.
Bashkë me borën në Kukës e Tropojë u rikthye edhe problematika e ndërprerjes së energjisë.
Fshati Bushtricë, Tropoja e Vjetër, Lekbibaj dhe Llugaj BashkiaTropojë, sikurse Zarishta në Has kanë raportuar defekte në rrjet.
Reshjet e dëborës u rikthyen edhe në zonën e Kelmendit.
Në Lepushë dhe Vermosh trashësia ka arritur deri në 50 CM dhe Aksi Qafë- Vermosh kalohet vetëm me zinxhirë.
