Shpejtësia “vret” dy 21-vjeçarë, aksident në aksin Lushnje-Divjakë pas parakalimit mbi urë
Nga OraNews Përditësimi i fundit 8 Mars 2021, 15:54
Dy të rinj, vetëm 21-vjeç, mbetën viktima të një aksidenti në aksin Lushnje-Divjakë, që nga të dhënat e para kishte si shkak shpejtësinë dhe një parakalim të gabuar mbi urë. Ata e çuan në 11 numrin e viktimave në rrugë në 8 ditët e para të Marsit.
Shpejtësia dhe shkelja e rregullave të qarkullimit u mori jetën dy 21-vjeçarëve në aksin Lushnje-Divjakë.
Ata po udhëtonin me një motor, kur pas një parakalimi të cilësuar të gabuar u përplasën me një makinë mbi urën e Gradishtës.
Goditja ka qenë e fortë dhe mjeti e ka marrë motorin për disa metra përpara.
Drejtuesi dhe pasagjeri kanë përfunduar jashtë rrugës dhe kanë humbur jetën menjëherë.
Viktimat u identifikuan si Justin Baba, banor i Gradishtës dhe Igli Çuni, nga fshati Korie.
Lexo edhe: Bilanci tragjik i aksidenteve, 41 të vdekur për dy muaj, ekspertët “fajësojnë” shpejtësinë
Mjeti drejtohej nga 51-vjeçari, Arsen Sinai, i cili është ndaluar nga Policia deri në sqarimin e rrethanave të plota të aksidentit.
Të paktën 11 persona kanë humbur jetën si pasojë e aksidenteve rrugore në 8 ditët e para të muajit Mars, ku më shumë se 20 të tjerë kanë mbetur të plagosur.
Vetëm në harkun e katër ditëve të fundit aksidentet u kanë marrë jetën 8 personave në vetëm tre aksidente.
Veç dy të rinjve ngjarjes në Lushnje, tre persona humbën jetën në by pass-in e Rrogozhinës e tre të tjerë në Kashar të Tiranës, ngjarje për të cilën gjykata la në burg drejtuesin e mjetit Zija Murati.
Në tre muaj, 41 persona kanë humbur jetën dhe janë plagosur mbi 280 të tjerë në rrugët e vendit.
Shpejtësia dhe shkelja e rregullave të qarkullimit ka qenë shkaku kryesor.
