Miratohet udhëzimi, maturantët do të japin 4 provime në qershor, ja datat
Nga OraNews Përditësimi i fundit 8 Shkurt 2021, 18:14
Në 3 qershor maturantët do të zhvillojnë provimin e parë, atë të Gjuhës së Huaj. Provimet e tjera të Gjuhës Shqipe e Letërsisë, Matematikës dhe Lëndës me Zgjedhje do të zhvillohen përkatësisht në datat 7, 11 dhe 15 qershor.
Sezoni i provimeve për Maturën Shtetërore të këtij viti do të nisë më 3 qershor me testin e Gjuhës së huaj.
Në datat 7 dhe 11 maturantët do të testojnë njohurinë në provimet e detyrueshme të Gjuhës Shqipe dhe Letërsisë si dhe në atë te Matematikës.
I fundit provim do të jetë ai i Lëndës me Zgjedhje, të cilit maturantët do t`i nënshtrohen në datën 15 qershor.
Ajo që vihet re nga Udhëzimi i Ministrisë së Arsimit është se të rinjtë do të kenë vetëm 4 ditë kohë për t`u përgatitur për secilin testim.
Në udhëzim sqarohet më tej se provimet do të përbëhen nga 60 pikë dhe se maturantët do të kenë në dispozicion 2 orë e 30 minuta për t`ju përgjigjur pyetjeve me alternativë dhe atyre me shtjellim.
Ata që nuk do të arrijnë të marrin notë kaluese në sezonin e qershorit do të kenë mundësi ta përsërisin testimin në sezonin e vjeshtës.
Rregullave të ashpra këtë vit u shtohen edhe masat e imponuara prej pandemisë së koronavirusit.
Çdo maturanti para nisjes së provimit do t`i matet temperatura ndërsa testet do të zhvillohen në distancë.
Datat e provimeve
a)Gjuhë e Huaj 3 qershor
b)Gjuhë Shqipe dhe Letërsi 7 qershor
c)Matematikë 11 qershor
d)Provimi me zgjedhje 15 qershor
