Mes mjerimit/ Familja Karaj me tre invalidë iku nga çadra dhe u strehua në shtëpinë e rrënuar
Nga OraNews Përditësimi i fundit 8 Shkurt 2021, 17:25
Varfëria është ulur këmbëkryq në familjen e Zija Karajt në Baldushk të Tiranës. Me tre djemtë e sëmurë dhe me shtëpinë e shkatërruar nga tërmeti, kryefamiljari bën thirrje për ndihmë.
Në këtë shtëpi në Baldushk, që pritet të shembet nga dita në ditë dhe në varfëri ekstreme, jetojnë 5 anëtarët e familjes Karaj.
Aty nuk ka asgjë, edhe ato pak orendi pothuajse janë të shkatërruara.
Që pas tërmetit të 26 nëntorit familja e Zija Karajt ka jetuar në çadër por reshjet e shiut i kanë detyruar të rifuten në shtëpinë e pabanueshme.
"Është e pabanueshme, këtu nuk rrihet. Nuk kemi ku të shkojmë, vetëm në çadër dhe këtu."
"Shtëpia është kryesorja, po nuk pate shtëpi nuk ke jetë."
Sikur mos mjaftonte varfëria tre djemtë e shtëpisë janë me probleme shëndetësore.
"Po pate fëmijë sëmurë nuk ka më vështirë, do të vuaj sa të kem jetë."
Kjo familje jeton me frikën e shembjes së shtëpisë në çdo moment dhe e vetmja shpresë mbetet një mrekulli nga Zoti.
"Shpresojmë te Allahu."
Dhe pse kryetari i njësisë administrative u premtoi se janë të parët në listë për rindërtimin e shtëpisë, ka kaluar më shumë se një vit dhe ende nuk është bërë asgjë.
"Llafe të mira, më kanë thënë që je i pari në listë. Unë nuk kam dalë as nga fundi. Po bëjnë shtëpi gjithandej."
Ndaj mes skamjes ekstreme, kjo familje kërkon një strehë të sigurt për të futur kokën.
