Produkte pa etiketa në Conad, Ora News zbulon skandalin me produktet ushqimore të importuara
Nga OraNews Përditësimi i fundit 18 Dhjetor 2020, 21:14
Skandalet me ushqimet në supermarketet Conad nuk kanë fund. Pas tregtimit të ushqimeve të skaduara, supermarketet Conad tregtojnë produkte të paimportuara pa etiketat të cilat japin informacion. Supermarketi Conad e mohon një gjë të tillë por Ora News ka sjellë fakte që produktet shiten pa etiketa.
Edhe pse janë propozuar ndryshime në kodin penal sa i përket forcimit të masave për rritjen e sigurisë ushqimore në vend, nuk ka patur efekt.Në shumë supermarkete ka probleme të ndryshme.
Ashtu siç mund ta shihni nga pamjet në video, në dyqanet e Conad tregtohen produkte të importuara pa etiketën e domosdoshme e cila jep informacion mbi përmbajtjen e produktit.
Në video shihet qartë që punonjësja e Conad po vendos etiketat, pasi këto produkte i ka nxjerrë në shitje në shkelje të legjislacionit.
Me vendimin nr.434, datë 11.07.2018 për etiketimin e ushqimeve dhe informimin e konsumatorit, operatorët e bizneseve duhet të vendosin etiketat në gjuhën shqipe mbi produktet e importuara nga jashtë për të dhënë informacionin e duhur tek konsumatorët për ndikimin në shëndet.
Pas konstatimit të këtij skandali, Ora News iu drejtua supermarketit Conad, ku ky i fundit shprehet se çdo produkti para se të vihet në raft për shitje i vendoset etiketa e përkthimit në gjuhën shqipe, duke shtuar se ky jo vetëm është një rregull i parashikuar në legjislacion por dhe si rregull i brendshëm i kompanisë.
Por faktet janë ndryshe, duke hedhur poshtë pretendimet e supermarketit Conad.
