Protesta në Shkodër, plagoset një nga punonjësit e forcave Shqiponja
Nga OraNews Përditësimi i fundit 12 Dhjetor 2020, 14:15
Mesditën e sotme në protestën e zhvilluar në qytetin e Shkodrës ku protestues të shumtë, kryesisht të rinj kanë shkatërruar dhe djegur objekte të selisë së Partisë Socialiste, ka mbetur i plagosur dhe një punonjës policie nga forcat Shqiponja.
Lajmin e ka bërë të ditur Policia e Shkodrës në një njoftim zyrtar ku thuhet se punonjësi i plagosur u dërgua menjëherë në Spitalin Rajonal Shkodër për mjekim.
Njoftimi i policisë Shkodër:
Gjatë tubimit të paligjshëm të zhvilluar sot në orën 11:00, ku pjesëmarrësit filluan lëvizjen nga sheshi Luigj Gurakuqi drejt pedonales së qytetit, para Prefekturës dhe gjate marshimit kanë ndaluar ne rrugën Ëillson.
Pjesëmarrësit në tubim kanë dëmtuar me sende të forta godinën e një subjekti politik duke thyer e shkatërruar dritaret dhe dyert e më pas nxorën dhe dogjën bazën materiale që ishte në brendësi të godinës.
Gjithashtu gjatë tubimit është gjuajtur me sende të forta në drejtim të Policisë dhe për pasojë është plagosur një nga punonjësit e Policisë të Forcës së Posaçme Shqiponja i cili u dërgua menjëherë në Spitalin Rajonal Shkodër për mjekim.
