Karikatura e pazakontë e Erdogan/ Turqia akuzon Charlie Hebdon për "racizëm kulturor"
Nga OraNews Përditësimi i fundit 28 Tetor 2020, 10:25
Turqia pritet të reagojë ligjërisht dhe diplomatikisht ndaj një karikature të presidentit turk, Reçep Taip Erdoan, që po qarkullon në gjithë botën.
Revista satirike "Charlie Hebdo" e hapi të mërkurën faqen e saj të parë me një vizatim të Erdoganit duke ndenjur ulur ndërsa dora e tij zbulonte shpinën e një gruaje të veshur me ferexhe.
Karikatura shoqërohej me nëntekstin: "Erdogani në jetën private është shakaxhi i madh".
Zyra e shtypit e presidencës turke e konsideroi karikaturën "vulgare dhe imorale, produkt i ksenofobisë, islamofobisë dhe intolerancës kulturore, të cilën lidershipi francez duket se e dëshiron për vendin e vet."
Prokuroria turke informoi nisjen e hetimit ndaj drejtuesve të revistës "Charlie Hebdo" për fyerje të figurës së shtetit, ndërsa Erdoani gjatë një aktiviteti tha se ai nuk e ka parë vizatimin në fjalë.
"Jemi në një kohë kur armiqësia ndaj islamit, myslimanëve dhe mungesa e respektit për profetin tonë po përhapet si kanceri ndër liderët e Europës," deklaroi Erdogan.
Turqia dhe Franca vijojnë përplasjet që kur presidenti Makron bëri të ditur masat e shtetit të tij për ta shpëtuar fenë islame nga kriza dhe radikalizmi, i nxitur nga vrasja e një mësuesi francez nga një 18-vjeçar mysliman pse ai u kishte shfaqur nxënësve karikatura të profetit.
Erdogani u përgjigj se homologu francez ka probleme me shëndetin mendor dhe sikundër vendet e tjera myslimane këtë javë bëri thirrje për bojkotimin e markave franceze.
Myslimanët janë komuniteti fetar i dyti më i madh në Francë, por presidenti Makron këmbëngul se vendi i tij nuk do heqë dorë nga ekspozimi i karikaturave pavarësisht protestës, do luftojë për lirinë e fjalës dhe do të vazhdojë të respektojë pikëpamjet e kundërta fetare.
