I shpëtuan ferrit, momenti emocioues kur mamaja përqafon Endri Dumanin
Nga OraNews Përditësimi i fundit 27 Tetor 2020, 14:24
7 vite pas largimit nga Shqipëria, këtë të martë u riatdhesuan 5 personat e parë nga zonat e konfliktit në Siri. Tërheqja e tyre u mundësua nga forcat e Antiterrorit dhe partnerët ndërkombëtarë, ndërsa në Shqipëri u pritën nga dhjetëra familjarët dhe të afërm. Operacioni i ditëve të fundit pritet të pasohet me tjetër ndërhyrje për të rikthyer të tjerë shtetas shqiptarë.
Shtatë vite pasi u larguan nga Shqipëria për tu vendosur në zonat e luftës në Siri, Floresha Rasha, 3 fëmijët e saj dhe 12 vjeçari Endri Dumani u riatdhesuan të martën në aeroportin e Rinasit.
Pesë personat e parë që u shpëtuan nga kampi Al-Hol u shoqëruan nga forcat e Antiterrorit nga momenti i tërheqjes nga kampi deri tek mbërritja në Tiranë.
Në ambientet e aeroportit, dhjetëra familjarë dhe të afërm prisnin me pankarta në duar takimin me të afërmit.
Momenti më emocionues ishte takimi i Mide Dumanit me djalin e saj 12-vjeç Endrin, të cilin kishte 7 vite pa e takuar.
Riatdhesimi i 5 personave të parë u shoqërua dhe nga kryeministri Edi Rama, i cili tha se nxjerrja e fëmijëve nga kampi në Siri ka qenë një operacion i ndërlikuar.
Drejtori i Antiterrorit, Gledis Nano, tha se do të ketë një tjetër operacion për tërheqjen e shqiptarëve të tjerë.
5 personat e parë do të dërgohen tek shtëpia e pushimit në Durrës, ku do ti nënshtrohen disa programeve rehabilituese me qëllim riintegrimin në shoqëri.
