OBSH: Hapja e shteteve pa vënë nën kontroll Covid-19, "recetë për katastrofë"
Nga OraNews Përditësimi i fundit 1 Shtator 2020, 07:47
Organizata Botërore e Shëndetësisë (OBSH) u bën thirrje shteteve që të vazhdojnë zbatimin e masave kufizuese me qëllim luftimin e Covid-19.
Drejtori i përgjithshëm i kësaj organizate, Tedros Adhanom Ghebreyesus, u shpreh se heqja e masave kufizuese pa pasur nën kontroll virusin, mund të jetë “recetë për katastrofë”.
Tedros e ka pranuar se shumë njerëz janë lodhur nga masat kufizuese dhe se dëshirojnë t’i kthehen normalitetit pas tetë muajve të përballjes me rrezikun e koronavirusit.
“Ne duam të shohim që fëmijët kthehen në shkollë dhe që njerëzit t’iu kthehen vendeve të punës, mirëpo ne duam që kjo gjë të bëhet në mënyrë të sigurt”, ka thënë Tedros në një konferencë për media.
“Asnjë shtet nuk mund të pretendojë se pandemia ka përfunduar”, ka thënë ai.
“Realiteti është që ky virus shpërndahet lehtë. Hapja pa kontroll është recetë për katastrofë”, ka thënë mes tjerash ai përgjatë një konference për media në Gjenevë.
