Moore-Rama: SHBA do mbështesë Shqipërinë në rrugën e reformave
Nga OraNews Përditësimi i fundit 13 Maj 2014, 19:37
SHBA-Gjatë qëndrimit në Washington DC, ku gjendet me ftesë të Komunitetit Hebraik Amerikan (AJC) për të marrë pjesë në Forumin Global për çështjet e sigurisë dhe zhvillimit ekonomik, anëtari i Komisionit Parlamentar për Çështjet e Sigurisë, z. Luan Rama u prit në një takim të veçantë në Departamentin e Shtetit të SHBA-ve nga Drejtori për Europën Juglindore, z. Jonathan Moore.Deputeti Luan Rama iu përgjigj interesimit të z. Moore për zhvillimet e fundit politike në Shqipëri dhe ecurinë e reformave. Një vend të veçantë gjatë bisedimit zuri edhe rëndësia që merr dialogu dhe partneriteti politik për suksesin e këtyre reformave.Rama theksoi se reforma në drejtësi dhe ajo territoriale administrative janë prioritete për Shqipërinë, të cilat realisht kanë nevojë për konsensus politik dhe për bashkëpunimin e opozitës, por nuk mund të pengohen për interesa parciale.Gjithashtu Rama nënvizoi rëndësinë e veçantë që merr forcimi dhe zgjerimi i mëtejshëm i bashkëpunimit me SHBA, si partnere strategjike dhe fondamentale për Shqipërinë.Ai vuri në dukje gjithashtu se "është e rëndësishme që reformat në institucionet e sigurisë dhe mbrojtjes të zhvillohen në konsultë dhe partneritet të ngushtë me NATO-n dhe SHBA”.Nga ana e tij, Jonathan Moore, theksoi se SHBA do të vazhdojë t'a mbështesë Shqipërinë në rrugën e reformave në interes të forcimit të rolit të Shqipërisë në rajon, si vend anëtar i NATO-s.Gjatë qëndrimit në Washington, përfaqësuesit e Kuvendit të Shqipërisë, deputeti Luan Rama dhe Këshilltari i Kryetarit të Kuvendit për Politikën e Jashtme, Ralf Gjoni, u pritën gjithashtu në Kongres dhe u takuan me përfaqësues të Komisionit Amerikan të Helsinkit, Fondacionit Open Society dhe Institutit Demokratik Amerikan NDI.
