VËSHTIRË TË BLESH NJË SHTËPI/ Agjenti imobiliar Beti: Rritja e kostove të ndërtimit rrit qiratë në kryeqytet
Nga Sonila Musai Përditësimi i fundit 24 Maj 2026, 10:18
Nëse disa vite më parë, me një pagë mesatare mund të përballoje një apartament me qira, sot situata është krejt ndryshe.
Çmimet janë rritur ndjeshëm, ndërsa qytetarët e kanë gjithnjë e më të vështirë të gjejnë një shtëpi me kosto të përballueshme.
Orgest Beti, agjent imobiliar, thotë se në Shqipëri funksionon tregu i lirë, ku çmimet përcaktohen nga kërkesa dhe oferta, ndërsa zgjidhja duhet kërkuar më shumë te politikat sociale, si strehimi social dhe kreditë e buta për çiftet e reja.
Beti shton se çmimet e larta të qirave kanë origjinën që në momentin e blerjes së apartamentit.
Sa i përket zonave më të kërkuara, eksperti thotë se në Tiranë, në krye mbeten Tirana e Re, Blloku, zona e Parkut të Liqenit Artificial, Myslym Shyri dhe Komuna e Parisit.
Megjithatë, tregu po zgjerohet edhe drejt zonave të reja si Bulevardi i Ri, Astiri dhe Paskuqani, të cilat po fitojnë vëmendje për shkak të zhvillimeve infrastrukturore.
Sipas zhvilluesve të tregut, në vitet e ardhshme Tirana pritet të transformohet në një qytet gjithnjë e më policentrik, ku kufijtë tradicionalë të qendrës do të zbehen, ndërsa zhvillimi urban do të shtrihet drejt periferive dhe zonave të reja.
