BE në debat për Ukrainën/ Irlanda: Statusi “i asociuar” rrezikon ngadalësimin e integrimit
Nga OraNews Përditësimi i fundit 22 Maj 2026, 19:58
Ministrja e Jashtme e Irlandës, Helen McEntee, ka shprehur shqetësim lidhur me propozimin për krijimin e një statusi të “anëtarësimit të asociuar” për Ukrainën në Bashkimin Europian.
Sipas saj, një model i tillë mund të krijojë pasiguri për Ukrainën dhe të ngadalësojë procesin e saj drejt anëtarësimit të plotë në BE. Ajo ka ngritur edhe shqetësimin se një qasje e tillë mund të sjellë një ndarje mes vendeve kandidate, duke krijuar dy nivele në procesin e integrimit europian.
Deklaratat e saj vijnë pas një propozimi të kancelarit gjerman Friedrich Merz, i cili sugjeron që Ukraina të ketë një integrim gradual në strukturat e BE-së, duke marrë pjesë në disa programe dhe institucione, por pa të drejtë vote në vendimmarrje.
McEntee ka vënë në dukje se një status i ndërmjetëm mund të ndikojë edhe në motivimin e Ukrainës për të vazhduar reformat e nevojshme për anëtarësim të plotë.
Nga ana e tij, Merz argumenton se procesi i pranimit të Ukrainës është kompleks dhe nuk mund të përmbyllet shpejt për shkak të procedurave dhe miratimeve në vendet anëtare, ndaj propozon një qasje me hapa të përshkallëzuar drejt integrimit në BE.
