Stacionet e plazhit, kontratat e qirave për sezonin 2026 do të lidhen brenda qershorit
Nga OraNews Përditësimi i fundit 13 Maj 2026, 21:17
Këshilli i Ministrave miratoi sot disa shtesa në vendimin “Për miratimin e rregullores për kushtet dhe kriteret e ushtrimit të veprimtarisë së stacionit të plazhit”, duke parashikuar afate të reja dhe mundësi amendimi për kontratat e përdorimit të hapësirave bregdetare.
Sipas vendimit, për vitin 2026 afati për lidhjen e kontratave të qirasë për përdorimin e stacioneve të plazhit do të jetë brenda muajit qershor.
Ndryshimet e miratuara parashikojnë gjithashtu mundësinë e amendimit të kontratave ekzistuese apo të reja për përdorimin e hapësirës së plazhit, në rastet e ndryshimeve në kapacitetin e strukturës akomoduese, zonës së plazhit apo zhvillimeve në zonën bregdetare.
Në vendim përcaktohet se çdo ndryshim do të kryhet vetëm me pëlqimin e ndërsjellë të palëve dhe përmes nënshkrimit të amendimeve përkatëse në kontratë.
Për zbatimin e këtij vendimi ngarkohen ministria përgjegjëse për Turizmin, Agjencia Kombëtare e Bregdetit dhe njësitë e vetëqeverisjes vendore.
Vendimi hyn në fuqi pas botimit në Fletoren Zyrtare.
