Gogu: Reforma në drejtësi po hyn në fazën e konsolidimit të standardeve europiane
Nga OraNews Përditësimi i fundit 8 Maj 2026, 18:12
Ministri i Drejtësisë, Toni Gogu raportoi sot në mbledhjen e Këshillit Kombëtar të Integrimit Europian progresin e Shqipërisë në Kapitullin 23, “Gjyqësori dhe të Drejtat Themelore”, duke theksuar se reforma në drejtësi po hyn në fazën e konsolidimit të standardeve europiane.
Gogu deklaroi se gjatë periudhës 2025 – shkurt 2026 janë përmbushur 14 pika të ndërmjetme të negociatave, ndërsa janë adresuar 64 “critical gaps” në bashkëpunim me Komisionin Europian dhe 72 institucione shqiptare.
Në fjalën e tij, ministri i Drejtësisë vuri theksin te rezultatet konkrete për qytetarët, si ulja e stokut të çështjeve gjyqësore, reduktimi me 60% i backlog-ut në Gjykatën e Lartë krahasuar me vitin 2020, zgjerimi i ndihmës juridike falas dhe digjitalizimi i sistemit gjyqësor përmes platformës JURONIX.
Sipas të dhënave të prezantuara, vetëm gjatë vitit 2025 kanë përfituar ndihmë juridike parësore 5,863 qytetarë dhe ndihmë juridike dytësore 924 qytetarë në të gjithë vendin.
“Europa nuk matet vetëm me kapituj negociatash, por me besimin që qytetari ka tek drejtësia”, u shpreh Gogu, gjatë diskutimit në KKIE.
Ai theksoi gjithashtu se Shqipëria po punon për harmonizimin e mëtejshëm të Kodit Penal, Kodit të Procedurës Penale dhe legjislacionit për të drejtat themelore me acquis të Bashkimit Europian, ndërsa procesi i vetingut po hyn në fazën përfundimtare brenda mandatit kushtetues.
Mbledhja e KKIE u zhvillua në kuadër të aktiviteteve të Ditës së Europës dhe fokusit të Shqipërisë për avancimin e negociatave të anëtarësimit në Bashkimin Europian.
