Zjarri në landfillin e Bushatit /Hoti: Qytetarët e Shkodrës dhe Vaut të Dejës, po thithin toksina e dështimit të radhës nga qeveria
Nga OraNews Përditësimi i fundit 19 Prill 2026, 21:28
Deputeti i PD në qarkun e Shkodrës, Kliti Hoti ka reaguar në lidhje me zjarrin e rënë në landfillin e Bushatit. Sipas tij, qytetarët e Shkodrës dhe Vaut të Dejës nuk po thithin ajër, por toksinat e dështimit të radhës të kësaj qeverie.
‘Ky nuk është aksident, kjo është pasojë e drejtpërdrejtë e mungesës së kontrollit të skemës së mbetjeve në vend’, shkruan Hoti.
Reagimi i deputetit Kliti Hoti:
Sot, qytetarët e Shkodrës dhe Vaut të Dejës nuk po thithin ajër, por toksinat e dështimit të radhës të kësaj qeverie.
Retë e zeza mbi landfillin e Bushatit janë dëshmia ulëritëse e një arrogance që nuk njeh kufi dhe e një paaftësie që po na kushton shëndetin.
Si mund të flitet për ‘shëndetin publik’ kur lihen të digjen male me mbetje kimike e plastike në mes të ditës? Kush mban përgjegjësi për këtë katastrofë ekologjike që po helmon banorët?
Ky nuk është aksident, kjo është pasojë e drejtpërdrejtë e mungesës së kontrollit, investimeve të munguara dhe keqmenaxhimit korruptiv të skemës së mbetjeve në vend.
Si deputet i qarkut te Shkodrës kërkoj që kjo ngjarje të zbardhet sa më parë.
