Sulmi kibernetik në Postën Shqiptare/ Demo: Shërbimet vazhdojnë normalisht
Nga Bekim Bici Përditësimi i fundit 26 Mars 2026, 10:31
Ministri i Shtetit për Pushtetin Vendor, Ervin Demo, bëri të ditur se institucionet përgjegjëse po zhvillojnë një analizë të detajuar mbi ngjarjen e ndodhur një ditë më parë, ku u raportua një sulm kibernetik ndaj Postës Shqiptare.
Në një konferencë për mediet pas mbledhjes së qeverisë, Demo u shpreh se, pavarësisht incidentit, të gjitha shërbimet e Postës Shqiptare vijojnë të funksionojnë normalisht.
I pyetur nga "Ora News" mbi ndikimin e mundshëm të sulmit, ai deklaroi se deri tani nuk ka të dhëna që informacione të painkriptuara të jenë bërë të aksesueshme për qytetarët.
Megjithatë, ministri theksoi se duhet pritur raporti përfundimtar i ekspertëve për të përcaktuar saktësisht çfarë ka ndodhur.
“Është duke u zhvilluar një analizë e detajuar nga Autoriteti Kombëtar i Kibernetikës. Të gjitha shërbimet vazhdojnë normalisht. Nuk ka të dhëna se ka të dhëna të hakuara.
Do presim raportin e të gjithë institucioneve se çfarë ka ndodhur në Postën Shqiptare”, tha Demo.
Demo nënvizoi gjithashtu se Shqipëria ka bërë progres të shpejtë në fushën e sigurisë kibernetike, duke rritur kapacitetet për përballimin e incidenteve të tilla.
