"Një narko-shtet s'mund të hyjë në Europë"/ Bumçi: Ky është një realitet i ri, Shqipëria ka humbur mundësinë historike për integrim të shpejtë
Nga OraNews Përditësimi i fundit 13 Mars 2026, 09:53
Në një lidhje direkte për OraNews, Aldo Bumçi tha se Shqipëria po përballet me një krizë të thellë pas 13 viteve qeverisje të Edi Ramës.
Sipas tij, kjo periudhë ka dëmtuar vendin më shumë se çdo qeverisje tjetër që nga rënia e komunizmit dhe ka shkatërruar një mundësi të artë për integrimin e shpejtë në Bashkimin Europian.
Bumçi shpjegoi se vendi tani perceptohet si një “narko-shtet”, për shkak të lidhjeve të trafikut të drogës me korrupsionin masiv dhe dhunimin e proceseve zgjedhore.
Ai theksoi se SHBA-të prej një viti theksojnë nevojën urgjente për të luftuar trafikun e drogës dhe pastrimin e parave.
“Lufta në Ukrainë krijoi një korsi të shpejtë drejt BE-së për Ballkanin Perëndimor, por Shqipëria e ka djegur këtë mundësi me rrënimin e institucioneve dhe shtetit ligjor,” tha Bumçi.
Ai shtoi se çështjet aktuale, si rastet e zëvendëskryeministres Balluku, tuneli i Llogarasë kanë sjellë një qëndrim më të ashpër dhe kritik nga partnerët ndërkombëtarë, veçanërisht nga Gjermania, duke ndryshuar totalisht tonin që ishte përdorur vetëm pak muaj më parë.
"Ky është një realitet i ri. Nuk ka Europë pa demokraci, pa të drejta njeriu dhe pa një shtet të së drejtës funksional. Një narko-shtet nuk mund të hyjë në familjen europiane. Shqipëria ka humbur mundësinë historike për integrim të shpejtë."- tha ai.
