“I kapur me presh në dorë”/ Blushi: Kryeministri ka frikë nga drejtësia dhe nga aferat korruptive
Nga OraNews Përditësimi i fundit 9 Mars 2026, 17:47
Sekretari i Përgjithshëm i Partisë së Lirisë, Tedi Blushi, reagoi me akuza të forta ndaj kryeministrit Edi Rama lidhur me zhvillimet e fundit politike dhe debatet për drejtësinë.
Sipas tij, qëndrimet e kryeministrit tregojnë se Reforma në Drejtësi është braktisur dhe se qeveria po përpiqet të mbrojë veten nga hetimet për çështje që lidhen me korrupsionin.
Blushi e lidh këtë situatë edhe me diskutimet për ministren Belinda Balluku, duke thënë se kryeministri po vepron për të mbrojtur njerëzit e tij në qeveri.
Ai përmendi disa çështje që opozita i konsideron problematike, si projekti i inceneratorit të Tiranës, koncesionet në shëndetësi, çështjet që lidhen me portin e Durrësit dhe disa projekte infrastrukturore.
Sipas Blushit, këto janë aferat që, sipas tij, kanë rritur presionin ndaj qeverisë dhe kanë shtuar përplasjen me drejtësinë.
Në reagim përmendet edhe raporti i fundit i Transparency International, ku Shqipëria renditet më poshtë krahasuar me një vit më parë për perceptimin e korrupsionit.
Në fund të reagimit, Blushi u bëri thirrje qytetarëve të marrin pjesë në protestën e paralajmëruar më 12 mars para Parlamentit, duke e cilësuar atë si një reagim ndaj situatës politike dhe akuzave për korrupsion ndaj qeverisë.
