Reshje të dëborës deri në 40 cm/ Fshatra të izoluara dhe mungesë energjie në Dibër
Nga OraNews Përditësimi i fundit 11 Janar 2026, 08:55
Reshjet e dendura të borës kanë shkaktuar probleme të shumta në disa njësi administrative të Qarkut Dibër. Prej ditës së djeshme, në shumë zona mungon energjia elektrike.
Trashësia e borës në njësitë Lurë, Kala e Dodës, Selishtë dhe Muhurr ka kaluar mbi 40 centimetra.
Bashkia Dibër po punon intensivisht për hapjen e rrugëve drejt fshatrave, megjithatë në këto momente raportohet se ende ka fshatra të izoluara.
Në qytetin e Peshkopisë, trashësia e borës arrin rreth 20 centimetra.
Rruga Peshkopi–Kukës kalohet vetëm me zinxhirë dhe me vështirësi të mëdha.
Ndërsa segmenti te Ura e Çerenecit – Librazhd është aktualisht i pakalueshëm, por po punohet për hapjen e tij.
Rruga Peshkopi–Tiranë është e qarkullueshme pa zinxhirë.
Në të gjithë qarkun, strukturat përkatëse po vijojnë punën për pastrimin dhe hapjen e rrugëve rurale.
