NGA EROZIONI TEK I NXEHTI EKSTREM/ Turizmi, ndër sektorët më të kërcënuar nga ndryshimet klimatike
Nga OraNews Përditësimi i fundit 7 Dhjetor 2025, 11:21
Turizmi, një nga motorët kryesorë të ekonomisë shqiptare, po renditet ndër sektorët më të rrezikuar nga ndryshimet klimatike.
Rritja e nivelit të detit, erozioni bregdetar dhe valët e të nxehtit ekstrem po ndikojnë gjithnjë e më shumë në vijën bregdetare dhe në zonat turistike të vendit.
“Ndryshimet klimatike mbi vijën bregdetare parashikojnë një rritje të presionit nga rritja e nivelit të detit. Apo nga fenomenet që rrisin kryesisht erozionin bregdetar të vendit.
Kemi shumë zonë si për shembull zonën e Semanit, në zonën e Shëngjinit, të cilët kanë një erozion të shprehur. Deti avancon drejt bregut.
Për rrjedhojë kjo rrit rrezikun ndaj fasiliteteve dhe objekteve turistike që janë në breg.”-tha ai.
Efektet tashmë janë të prekshme: temperaturat ekstreme dhe lagështia e lartë i kanë bërë plazhet më pak të rehatshme, duke ulur ditët e qëndrimit dhe duke dëmtuar imazhin e destinacioneve tona verore.
Por goditja nuk kufizohet vetëm te bregdeti.
Edhe turizmi malor, ekoturizmi dhe agroturizmi janë nën presion, pasi ndryshimet e motit ndikojnë në pyje, shtegje, ujëvara dhe zonat alpine, atraksione që vitet e fundit kanë sjellë rritjen më të madhe të vizitorëve.
Dëmi ekonomik i klimës nuk është më skenar i së ardhmes, por realitet i sotëm.
Shqipëria ka qenë prej vitesh një destinacion premtues, por ndryshimet klimatike po e shndërrojnë këtë premtim në një sfidë të madhe për sezonet e ardhshme.
